Star chiusi in casa ne ga fatto andar un poco fora de testa: prima se fazeva pan e biscotti, dopo se
cantava sui pergoli, dopo la ciamada in zoom per far ginnastica…ma alla fine quel che ne dava più
soddisfazion iera lustrar casa e ‘lora, daghe de oio de gomito, tachemo la musica e comincemo
seguendo l’esempio dei Queen e della loro I want to break free.
Comincemo lustrando l’argenteria, come fazeva i nostri veci zercando de far bela figura, sperando
che qualchedun prima o dopo ne vegni a trovar, cusì tiremo fora el parecio bon, ghe demo una
lavada e speremo che basti per tutti. Fortuna che gavemo fatto scorta de detersivo, quel bon che
quando xè tutto neto par ch’el soni.
Ciò, ma ‘sta polvere, la gavemo netada ieri e la xè zà qua che la ne saluda e la ne ciol in giro, ne
tocca tirar fora el battipanni e el piumin per tirarla su, almeno gavemo la musica che ne fa un poco
de allegria.
Tutta la casa xè fatta, adesso dovemo solo lavar per tera, fortuna che gavemo dei moci ballerini che
par che i vadi da soli.
Orpodecacco! Se semo dimenticadi el condotto! No so voi, ma la roba che ne urta de più e se la
lasemo sempre per ultima xè netar el condotto, per quanto te lo lustri e te lo fa bel, resta sempre un
condotto!
Per starghe drio a tutta la casa bisognassi gaver più brazi, per fortuna gavemo la nostra siora Iole
che la xè tanto svelta e brava che par che la gabi tanti brazi (la xè notada, no preoccupeve!).

5^ ex aequo con Ongia con punti 294