Sto anno semo tornadi a scola anche noi!!
Bisogna sempre migliorarse e non ne bastava imparar una o due robe…! Che confusion che gavemo in testa!!
Importante a scola xe rivarghe, e per questa occasion un bel SCOLABUS gavemo noleggià, speremo che qualche scolaretto lo ciapi e che lippe non fazi.
Gavemo inizià con la SCOLA GUIDA . Importante xe saver le regole della stradaper no risciar de incugnarse in contrada!! Xe tempo de imparar a guidar basta farse scarrozzar! Speremo ben che nissun se fazi niente senno all’Ongia el prossimo anno ghe servirà trovar altra gente!!
Semo rivadi tra i banchi con i libri ma xe tutto un poco bizzarro, semo in una scola con petoloni e liquidi strani, sembrassi come una SCOLA DE MAGIA ma…se senti un forte odor de sangria!
Ghe xe anche le fate in sta scola che le svola chissa’ cossa le sta combinando… dato che tutti qua se sta innamorando.
Femo un salto al mare, e cossa, no faremo un poca de SCOLA DE VELA? Tra alberi maestri, timoni, corde e gropi strani, sti skipper non sa proprio dove metter le mani!
E una SCOLA DE PESCA a Muja podessi mai mancar? Fra mulinei ed esche non sia mai che i ciapi un bel pesiolin, e che stasera femo un rebechin
Siccome ne gavemo per tutti i gusti e no se femo mancar niente anche la SCOLA DE BALLO ne xe saltada in mente, se gavemo cimentà in danze estreme, ma mejo restar sul classico.
E cossa dir delle note della SCOLA DE MUSICA qua vicin, senti, senti che casin!!!
Xe una banda assai rinomada, la banda dell’Ongia xè arrivada.
Dritti a SCOLA DE PITTURA, tra quadri, colori e penei, studiemo per far pastroci sempre più bei!
E se stucco e pittura fa bela figura doccia e savon fa un figuron.
Anche a SCOLA DE AGILITY semo andadi, ma me par che sti cani del Ongia xe un poco strani, el can ghe somiglia sempre al paron…! Però li gavemo messi a studiar, tra percorsi, salti e birilli de schivar el paron li rivera’ a educar?
Xe rivà l’inverno e noi che semo sportivi andemo a sciar pregando el ciel de no cascar! Ma se no semo capaci mejo far un poca de SCOLA DE SCI per imparar ben e tornar casa intieri!
Ve ricordè della marionetta che voleva andar a scola per imparar? Bhe! gavemo pensà che per farne vegnir voia de studiar, forsi se dovemo trasformar…nella speranza de imparar qualcosa!
E cussì una SCOLA DE MARIONETTE gavemo improvvisà e la sfilata la chiuderà-
Ormai semo diventadi una compagnia colta e ve saludemo anche per sta volta!

4^ classificata con punti 297

Aspetto scenografico carro principale: 66
Brio e machiettistica: 77
Cura e fantasia costumi: 81
Regia generale: 73
Totale punti: 297